Hoekom fiets- en staptoere?

Dit is 'n wonderlike manier om die pragtige platteland te ervaar wat so dikwels ongemerk by jou verbygaan as jy per motor of bus reis.

Ons stap- en fietsroetes neem jou langs riviere en mere, verby wingerde, woude en eeue-oue kastele en deur middeleeuse dorpies en geskiedkundige stede. Langs die pad kan jy vir 'n blaaskansie by koffiewinkels en biertuine stop. Jy kan wyne van omgewing proe en die plaaslike kos geniet, museums en monumente besoek, of sommer net met die inwoners gesels.

Ons toere laat jou toe om teen jou eie pas te reis en die program by jou eie unieke belangstellings en behoeftes aan te pas.

Hierdie is ook 'n ekonomiese manier om Europa te ontdek.

Wat is die aard van die pakkette?

Die pakkette is tussen 4 en 8 dae lank. Die verblyf is in plaaslike gastehuise of in klein 2 tot 4 ster hotelle. In sommige gevalle bly jy op 'n boot of selfs in kastele!

Die roetes word beplan oor kleiner fietspaadjies en lane, weg van die hoof verkeersroetes. Ons reisplanne neem jou verby plase en deur welige woude, langs romantiese riviere en deur prentjie-mooi dorpies. Jy sien nie net die platteland nie, jy ervaar dit met al jou sintuie.

Al ons toere is "stap of fietsry sonder bagasie"-pakkette. Dit beteken dat jy jou dag begin met 'n heilsame ontbyt wat deur jou vriendelike gasheer voorberei is, en eindig met jou bagasie wat reeds by die volgende hotel afgelaai is. Jy is dus vry om die dag ten volle te geniet.

Wie kan deelneem?

Die pakkette is spesiaal saamgestel vir paartjies of individue, gesinne met kinders of klein groepies vriende. Om deel te neem hoef jy nie 'n drawwer, atleet of fietsry-entoesias te wees nie - dié toere is bedoel vir almal!